कैलालीमा लागू औषध कारोबारमा संलग्न ८ जना एकै दिन पक्राउ परेका छन्। प्रहरीले शनिबार धनगढी, लम्की चुहा र भजनीका विभिन्न स्थानबाट उनीहरूलाई नियन्त्रणमा लिएको हो। पक्राउ परेकाहरूको साथबाट खैरो हेरोइनसहितका लागू औषध बरामद भएको प्रहरीले जनाएको छ।
धनगढी उपमहानगरपालिका–१३ झलारीबाट २३ वर्षीय प्रविन्द राना, २४ वर्षीय घुम्मन राना र १८ वर्षीय एक किशोर पक्राउ परेका छन्। प्रहरीका अनुसार शङ्का लागि चेकजाँच गर्दा उनीहरूको साथबाट १ ग्राम ८० मिलिग्राम लागू औषध खैरो हेरोइन बरामद गरिएको थियो।
त्यसैगरी लम्की चुहा नगरपालिका–१ थपालिपुरबाट २४ वर्षीय दिनेश बुढा र ललित राना क्षेत्री पक्राउ परेका छन्। उनीहरूको साथबाट ४२० मिलिग्राम लागू औषध खैरो हेरोइन फेला परेको प्रहरीले जनाएको छ।
त्यो क्षेत्रकै पायनियर्स बोर्डिङ स्कुल नजिकैबाट जानकी गाउँपालिका–३ लायकपुरका २४ वर्षीय जगदीश साउद पनि पक्राउ परेका छन्। चेकजाँचका क्रममा उनको साथबाट १३० मिलिग्राम खैरो हेरोइन बरामद गरिएको प्रहरीले बताएको छ।
यसैबीच भजनी नगरपालिका–९ पचमोडीयाबाट घोडाघोडी नगरपालिका–२ बनबासाका २५ वर्षीय डेबिड कठरीया र ३१ वर्षीय नरेन्द्र चौधरी पक्राउ परेका छन्। प्रहरीका अनुसार उनीहरूको साथबाट ५४० मिलिग्राम लागू औषध खैरो हेरोइन बरामद गरिएको हो।
प्रदेश प्रहरी कार्यालय धनगढीले सबै घटनाबारे थप अनुसन्धान भइरहेको जनाएको छ। पक्राउ परेकाहरूलाई आवश्यक कानूनी प्रक्रिया अघि बढाइएको र लागू औषध नियन्त्रणका लागि प्रहरीले अभियानलाई अझ कडाइका साथ अघि बढाउने जनाएको छ।
समाचार 
